आरोप आधारहीन रहेको चिनियाँ राजदूतकाे दाबी

काठमाडौं । चीनले नेपालमाथि नाकाबन्दी गरेको भन्ने आरोप आधारहीन भएको नेपालका लागि चिनियाँ राजदूत होउ यान्छीले बताएकी छन् ।

चिनियाँ दूतावासले आयोजना गरेको भर्चुअल पत्रकार सम्मेलनमा उनले नेपाल–चीनबीच पछिल्लो समयमा भएको द्वीपक्षीय व्यापारको तथ्यांकले त्यो नदेखाउने दावी गरिन् ।

नेपाल र चीनबीच १ अर्ब ७७ करोड अमेरिकी डलरको व्यापार भएको जानकारी दिदै उनले गत वर्ष भन्दा ६३ प्रतिशतले बढी व्यापारको कुरा गरिन् ।

कोरोना महामारीका कारण सिधा हवाई उडान रोकिएको र त्यसलाई पुनः सञ्चालन गर्ने विषयमा छलफल भइरहेको जानकारी दिइन् ।

तातोपानी र रसुवागढी नाकाबाट सीमापार व्यापार सुधार्ने विषयमा नेपाल र चीनको तिब्बत क्षेत्रका अधिकारीबीच एक महिनाभित्र बैठक हुन लागेको चिनियाँ राजदूत यान्छीले बताइन् ।