कक्षा ११ र १२ मासिक शुल्क छुट गर्ने विषयमा प्रधानाध्यापकहरुसँग छलफल

भक्तपुर । नगर क्षेत्रभित्रका कक्षा ११ र १२ सञ्चालन भएका सामुदायिक एवम् संस्थागत विद्यालयका प्रधानाध्यापकहरुको बैठक शुक्रबार सम्पन्न भएको छ ।

नगरपालिकाका प्रमुख सुनिल प्रजापतिको अध्यक्षतामा बसेको बैठकमा कक्षा ११ र १२ का विद्यार्थीको भौतिक उपस्थितिमा कक्षा सञ्चालन र कोभिडका कारण ती कक्षाहरुलाई मासिक शुल्क छुट गर्ने सम्बन्धि छलफल भएको हो ।

नगरभित्र सञ्चालित विद्यालयहरुमा ८, ९ र १० का कक्षाहरु आवश्यक स्वास्थ्य सुरक्षा अपनाई भौतिक उपस्थितिमा आलोपालो गरी कक्षाहरु परीक्षणको रुपमा सुरु गरिसकेको र आगामी दिनमा ११ र १२ कक्षा भौतिक उपस्थितिमा सुरु गर्न सम्बन्धित सरोकारवालाहरुसँग छलफल तथा परामर्शमा जुटिरहेको नगर प्रमुख प्रजापतिले बताए ।

बैठकमा प्रधानाध्यापकहरुले कम विद्यार्थी संख्या भएका विद्यालयहरुमा भौतिक उपस्थितिमा कक्षा सञ्चालन गर्न उपयुक्त हुने सुझाव दिए भने कक्षा ११ र १२ का विद्यार्थीहरुलाई नगरपालिकाले निर्णय गरेअनुसार मासिक शुल्कमा छुट दिन तयार रहेको बताए । प्रयोगात्मक कक्षाहरु सुचारु गर्नको निम्ति भौतिक उपस्थितिमा कक्षा सञ्चालन गर्नुपर्ने आवश्यकता भएको भन्दै अनलाइन मार्फत कक्षाहरु सञ्चालनमा जोड दिइरहेको बताए ।