कोरोनाले मृत्यु भएका दैलेखका एक पुरुषको परिवारका अन्य सदस्‍यको परीक्षण खोइ ?

२१ जेठ २०७७ दैलेख । कोरोना संक्रमणका कारणबाट मृत्यु भएका एक पुरुषको परिवारका अन्य सदस्‍यहरूको अहिलेसम्म कोरोना परीक्षण गरिएको छैन । जेठ १७ गते दैलेखको दुल्लु नगरपालिकास्थित पटाङ्गीनी क्वारेन्टाइनमा रहेका वडा नम्बर ११ का एक पुरुषको मृत्यु भएको थियो ।

भारतबाट घर फर्केका उनी क्वारेन्टाइनमा बसेको ८ दिन पछि मृत्यु भएको थियो। क्वारेन्टाइनबाट उनले परिवारका सदस्यसंग भेटघाट गरेका थिए। मृतकका परिवारमा श्रीमती, एक छोरा, एक छोरी र बुबाआमा गरी ६ सदस्‍य रहेका छन् ।

उनको मृत्यु भएपश्चात परिवारका सदस्यले कोरोनाको परीक्षण गरिदिन माग गरे पनि अहिलेसम्म उनीहरूको स्वाब संकलन नभएको वडाअध्यक्ष खगेन्द्र थापाले बताए। मृतकका परिवारले कोरोनाको जाँच गरिदिन माग गरे पनि अहिलेसम्म कुनै परीक्षण हुन सकेको उनले बताए ।

पछिल्लो समय कोरोना महामारीले दैलेखमा अग्रता लिएपनि सम्बन्धित निकायले चाँसो नदिएको स्थानीयले गुनासो गरेका छन् । दैलेखका साँसदहरुले प्रदेश सभामा कुरा उठाइरहेका छन् ।