कर्णालीमा १७ सयभन्दा साना उद्योग दर्ता

सुर्खेत । ठुलो तथा मझौला खालका उद्योधन्दा नभएको कर्णालीमा एक वर्षको अवधिमा एक हजार ७ सय ६८ वटा साना उद्योग दर्ता भएका छन् । आर्थिक वर्ष ०८०, ०८१ मा ती उद्योग दर्ता भएका हुन् । सबैभन्दा धेरै सुर्खेतमा ६७६ वटा उद्योग दर्ता भएको उद्योग तथा उपभोक्ता हित संरक्षण निर्देशनालयको तथ्याङ्क छ ।

यस्तै दैलेखमा १५६, जाजरकोटमा १५३, जुम्लामा २०४, कालिकोटमा १२२, मुगुमा १११, सल्यान र रुकुम पश्चिममा १०० र डोल्पामा ९३ वटा लघु, घरेलु तथा साना उद्योग समीक्षा वर्षमा दर्ता भएका छन् । कर्णालीमा दर्ता भएका लघु, घरेलु तथा साना उद्योगको संख्या ३८ हजार २८४ पुगेको छ ।

राष्ट्र बैंकले सार्वजनिक गरेको तथ्याङ्क अनुसार कर्णालीमा दर्ता भएका लघु, घरेलु तथा साना उद्योगको उपयोग क्षमता नै कमजोर छ । जसका कारण प्रदेशको कुल गार्हस्थ उत्पादनमा उद्योग क्षेत्रको योगदान पनि न्यून छ ।