निर्दयी बुहारी वृद्धाश्रम जान नमानेपछि गरिन् सासुको हत्या

एजेन्सी । वृद्धाश्रम जान नमानेको भन्दै भारतको नयाँ दिल्लीमा एक जना महिलाले आफ्नै सासुको हत्या गरेकी छन् । ४८ वर्षकी सरमिस्ठा सोमले आफ्नी ८६ वर्षकी सासु हर्षी सोमको कुटपिट गरेर हत्या गरेकी हुन । अनुसन्धानका क्रममा हर्षीकी बुहारी सरमिस्ठा दोषी देखिएकी हुन् ।

उनले वृद्धा सासुलाई हेरचाह गर्दा आफू वाक्क र दिक्क भएका कारण वृद्धाश्रममा पठाउने निधो गरेको बयान दिएकी छन् । वृद्धाश्रम जान नमानेपछि सासुको हत्या गरेको बुहारी सरमिस्ठाले स्वीकार गरेको प्रहरीले जनाएको छ ।

दिल्ली प्रहरीका अनुसार गत अप्रिल २८ मा हर्षीको शव नेब सराईस्थित अपार्टमेन्टमा भेटिएको थियो । तर उनलाई कसले हत्या गरेको हो भन्ने बारेमा थाहा नभएका कारण अनुसन्धान गर्न ढिलाई भएको प्रहरीले बताएको छ । उनको अनुहार र टाउकोमा गम्भीर चोट देखिएको छ ।