- २ असार २०८३, मंगलवार / Jun 16, 2026
३२ साउन २०७७ भक्तपुर । कोभिड १९ को संक्रमण समुदायस्तरमै फैलिँदै गएको अवस्थालाई मध्यनजर गर्दै भक्तपुर नगर प्रवेश गर्ने मुख्य नाकामा कडाइ गरिएको छ । विवरण संकलन र आवश्यक निगरानीका लागि भदौ १ गतेदेखि कर्मचारी खटाउने नगरपालिकाले जनाएको छ ।
भक्तपुर नपा पर्यटक सेवा केन्द्रका कर्मचारीबीच आइतबार बसेको बैठकले यस्तो निर्णय गरेको हो । बैठकमा नगर प्रमुख सुनिल प्रजापतिले संसारका ठूला र शक्तिशाली देश समेत कोरोनाको महामारी नियन्त्रण गर्न असफल भइरहेको विषम् परिस्थितिमा नेपालमा ‘महामारी फैलिन’ अघि नै समाजलाई जोगाउन सचेतना कार्यक्रम र व्यक्तिगत सुरक्षा अपनाई यो रोगको संक्रमणबाट जोगिन आवश्यक भएको बताए ।
कोभिड १९ को महामारी नियन्त्रणमा समाजवादी देश र पुँजीवादी देशबीच भिन्न–भिन्न अनुभव रहेको बताउदै प्रमुख प्रजापतिले समाजवादी देशहरुका सरकार जनताप्रतिको जिम्मेवारीबोधका कारण कोभिड १९ को संक्रमण नियन्त्रण गर्नमा सफलता प्राप्त गरेको बताए ।
बैठकमा वडा नं. ७ का वडाध्यक्ष उकेश कवां, वडा नं. ९ का वडाध्यक्ष रबिन्द्र ज्याख्व, नपाका प्रमुख प्रशासकीय अधिकृत रामलाल श्रेष्ठ र पर्यटक सूचना केन्द्रका प्रमुख गौतमप्रसाद लासिवाले आ–आफ्नो धारणा राखेका थिए । नगर प्रवेश गर्ने मुख्य नाका सल्लाघारी—नगरकोट सडक, कासान पुल, वन्ती, यातुमहादेव स्थान, शारदा क्याम्पस, गोसँ पुल, नाला सडक, थुसाचा, हनुमानघाट, भेलुखेल, राममन्दिर, बाराही र दूधपाटी रहेको छ ।
