महोत्तरीमा बिपी राजमार्गबाट ८६ किलो गाजा नियन्त्रण

महोत्तरी।  ८६ किलो प्रतिबन्धित लागूऔषध गाजा इलाका प्रहरी कार्यालय बर्दिबासले बरामद गरेको छ । काठमाडौंबाट सिन्धुली हुँदै बर्दिवासतर्फ आएको बोलेरोमा ८६ केजी ३६५ ग्राम गाँजा चेकजाँचका क्रममा बरामद गरेको इलाका प्रहरी कार्यालय बर्दिबासले जनाएको छ । बोलेरोसहित सिन्धुपाल्चोक सुनकोशी गाउँपालिका घर भएका ३१ वर्षीय रमेश राणा मगरलाई प्रहरीले अनुसन्धानका लागि नियन्त्रणमा लिएको जनाएको छ ।

बा १२ च ३९५५ नम्बरको बोलेरोको पछाडीको हुटमा लुकाएर ल्याएको उक्त गाजासहित बोलेरो चालकलाई पक्राउ गरेको प्रहरीले जनाएको छ । विशेष सूचनाका आधारमा लागूऔषध नियन्त्रण ब्यूरो साखा बिरगन्जबाट खटिएको टिमसहित इलाका प्रहरी कार्यालय बर्दिवासले उक्त गाडी दिनभर निगरानीमा राखेको थियो ।​