- ३० चैत्र २०८२, सोमबार / Apr 13, 2026
काठमाण्डौ, २३ पुस । बीमा कम्पनीहरूले आउँदो माघ १ गतेदेखि सबै प्रकारका भुक्तानीहरू अनिवार्य रूपमा विद्युतीय माध्यममार्फत् गर्नुपर्ने भएको छ।
बीमा प्राधिकरणले सबै बीमा कम्पनीहरूलाई निर्देशनसहित परिपत्र जारी गर्दै नगद भुक्तानीको अभ्यास अन्त्य गर्न स्पष्ट निर्देशन दिएको हो।
परिपत्रअनुसार माघ १ गतेपछि हुने बीमासम्बन्धी सबै भुक्तानीहरू सम्बन्धित व्यक्ति वा संस्थाको बैंक खातामा प्रत्यक्ष रूपमा स्थानान्तरण गर्नुपर्नेछ। बीमा दाबी भुक्तानी, बीमा रकम फिर्ता, कमिसन, सेवा शुल्क लगायत सबै प्रकारका आर्थिक कारोबार बैंकिङ प्रणालीमार्फत् गर्नुपर्ने व्यवस्था गरिएको छ।
नेपालमा हाल जीवन बीमा, निर्जीवन बीमा, लघुबीमा, पुनर्बीमा कम्पनी तथा बीमा एजेन्टहरू सञ्चालनमा रहेका छन्। बीमा प्राधिकरणको यो निर्देशन सबै प्रकारका बीमा कम्पनी तथा बीमा व्यवसायसँग सम्बन्धित पक्षहरूलाई समान रूपमा लागू हुनेछ।
बीमा क्षेत्रमा पारदर्शिता बढाउने, आर्थिक कारोबारलाई व्यवस्थित बनाउने तथा डिजिटल वित्तीय प्रणालीको प्रयोगलाई प्रोत्साहन गर्ने उद्देश्यले यो व्यवस्था लागू गर्न लागिएको प्राधिकरणले जनाएको छ। यसबाट बीमा क्षेत्रमा अनियमितता न्यूनीकरण हुने र सेवाग्राहीलाई समेत सहजता हुने अपेक्षा गरिएको छ।
