शोभा प्रधानको निधनमा शोक प्रस्ताव पारित

भक्तपुर । भक्तपुर नगरपालिकाका प्रमुख सुनिल प्रजापतिको अध्यक्षतामा रहेकाmे बाह्रौं नगरसभाको बैठकले स्व. शोभा प्रधान (बिजुक्छेँ) को निधनमा शोक प्रस्ताव पारित गरेको छ । आइतबार भक्तपुर नगरपालिकाको जारी बाह्रौं नगरसभाको बैठकले भक्तपुर नपाका कार्यपालिका सदस्य रोशनमैंया सुवालले प्रस्तुत गरेको शोक प्रस्तावलाई सर्वसम्मतिले पारित गरेको हो ।

बैठकले महिलाहरुलाई राजनैतिक चेतना सँगसँगै क्यान्सर रोगबारे स्वास्थ्य सचेतना जगाउने अभियानमा नेतृत्वदायी भूमिका निर्वाह गर्नुहुने स्व. शोभा प्रधानको निधनप्रति हार्दिक श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गरेको छ ।

नेपाल मजदुर किसान पार्टीका श्रद्धेय अध्यक्ष नारायणमान बिजुक्छेँ (रोहित) का जीवनसंगिनी तथा नेपाल क्रान्तिकारी महिला संघका केन्द्रीय कोषाध्यक्ष र नेपाल क्रान्तिकारी शिक्षक संघका केन्द्रीय सदस्य शोभा प्रधानको क्यान्सर रोगको उपचारका क्रममा २०७९ असार ८ गते निधन भएको थियो ।

बैठकमा बोल्नुहुँदै प्रमुख प्रजापतिले शोभा प्रधानको निधनले पार्टी र कार्यकर्तामाझ अपूरणीय क्षति पुगेको बताउँदै देश र समाजको निम्ति गर्नु भएको योगदानका कारण उहाँ अमर हुने बताए । समाज परिवर्तनमा प्रधानको उल्लेखनीय योगदान रहेको चर्चा गर्दै प्रमुख प्रजापतिले नेमकिपाका अध्यक्ष नारायणमान बिजुक्छेँको राजनीतिक जीवन सहज र सफल बनाउन शोभा प्रधानले निर्वाह गरेको भूमिका प्रशंसनीय र अविष्मरणीय रहेको उल्लेख गरे ।