हिमपातका कारण विद्युत र सडक अवरुद्ध

म्याग्दी । मुस्ताङमा भारी हिमपातका कारण सडक, विद्युत र हवाई सेवा अवरुद्ध भएको छ । हिमपातले गर्दा हिमाली जिल्ल्ला मुस्ताङ र म्याग्दीको जनजीवन अस्तव्यस्त बनेको हो । हिमपातका कारण सडकमा हिउँ जमेकाले बेनी–जोमसोम–कोरला सडक खण्डको लेतेदेखि माथिको खण्ड अवरुद्ध बनेको जनाइएको छ । मुस्ताङको सबै क्षेत्रमा हिमपात भएको भएपछि म्याग्दीका पनि अधिकांश स्थानमा हिमपात भएकाले जनजीवन प्रभावित बनेको हो ।

हिमपात र हावाहुरीले बिजुलीको तार चुडाएपछि मुस्ताङमा विद्युत् सेवा पनि अवरुद्ध भएको छ । वर्षा र हिमपातका कारण जोमसोम विमानस्थलमा हवाइ उडान समेत अबरुद्ध बनेको जनाइएको छ । हिमपातले गर्दा सडक बन्द भएकाले म्याग्दीबाट मुस्ताङतर्फ गाडी जान सकेका छैनन् । सडकमा जमेको हिउँ पग्लिएपछि र मौसम खुलेपछि मात्रै यातायात सञ्चालन हुने जनाइएको छ ।