- ३१ असार २०८३, बुधबार / Jul 15, 2026
जुम्ला । निर्माण नहुँदै पुल चर्किएपछि ठेकेदारप्रति प्रश्न उठेको छ । जुम्ला र कालीकोट जोड्ने हिमा नदीको सिंजाखोलामा बनिरहेको पुल चर्किएपछि ठेकेदार माथि नै प्रश्न उठेको हो । ठेक्का नम्बर ३ को यस पुल निर्माणका लागि सूर्य कन्ट्रक्सन फर्म प्रा.लि सुर्खेतले ठेक्का पाएको थियो । २०७४ साल कात्तिक ३० गते सम्झौता गरिएको पुलको निर्माणकार्य २०७५ साल चैत १४ गते सम्पन्न गरिसक्नुपर्ने थियो ।
सडक डिभिजन कार्यालयले पुल निर्माणका लागि तीन पटक म्याद थपिसके पनि निर्माण सम्पन्न भएको छैन् । ढलानसमेत गरिसकिएको पुल यही महिनादेखि सञ्चालनमा ल्याउने तयारी गर्दैगर्दा चर्किएपछि पुनः समस्या उत्पन्न झएको छ ।
पुलको डिजाइनमै समस्या भएपछि रिडिजाइन गर्नुपरेको थियो । अहिले पुलको काम रोकिएको छ ।
छिडेनाको पुलको भने निर्माणकार्य सम्पन्न भइसकेको छ । परीक्षणका क्रममा पुल चर्किएको सडक डिभिजन कार्यालय सुर्खेतले जनाएको छ । कालीकोटको छिडेना र सिंजा खोला जोड्ने पक्की पुल संयुक्त रुपमा १३ करोड रुपैयाँ लागतमा निर्माण भएको हो । यस ठाउँमा लामो समयअघि निर्माण भएको बेलिब्रिज पुल पनि जीर्ण भइसकेको छ । जीर्ण बेलिब्रिज पुलबाट यात्रा गर्दा जोखिम भएको भन्दै चाँडै पुल निर्माण गर्नुपर्ने स्थानीयको माग छ ।
