- १० असार २०८३, बुधबार / Jun 24, 2026
इरान । इरानले अन्तर्राष्ट्रिय आणविक ऊर्जा एजेन्सी (आइएईए)का निरीक्षकहरूलाई आफ्ना आणविक स्थल तथा जडान गरिने उपकरणको निरीक्षणका निम्ति अनुमति दिने वाचा गरेको छ । इरानी अधिकारीहरूले आफूसँग त्यस्तो वाचा गरेका आइएईएका प्रमुखले बताउनुभएको हो । संयुक्त राष्ट्रसङ्घीय निकाय आइएईएका महानिर्देशक राफेल मारियानो ग्रोसीले शानिबार इरानका राष्ट्रपति इब्राहिम रायसी र अन्य उच्च अधिकारीसँग भेटवार्ता गर्नुभएको थियो ।
सोही क्रममा उहाँहरूले आइएईएका निरीक्षणकर्तालाई सम्बन्धित स्थानमा पहुँच दिने वाचा गर्नुभएको महानिर्देशक ग्रोसीले आज यहाँ पत्रकारहरूलाई जानकारी दिनुभयो । विगतमा राष्ट्रसङ्घीय निकायलाई ती स्थानमा इरानले पहुँच दिन अस्वीकार गरेको थियो । इरानले के कस्ता उपकरण पुनस्थापना गर्छभन्ने विस्तृत जानकारी भने महानिर्देशक ग्रोसीले दिनुभएन । यद्यपि उहाँले विगतका अवरोध क्रमशः पन्छिदै गएका र केही ठोस कार्य गर्नचाहेको इरानी सङ्केत आफूले पाएको बताउनुभयो ।
उहाँले इरानको आश्वासनलाई सकारात्मक मान्नुपर्ने बताउनुभयो । तेहरानले आफ्नो विवादित आणविक कार्यक्रमको निगरानी गर्ने आइएईएका अधिकारीलाई पहँच दिनुपर्नेमा लामो समयदेखि राष्ट्रसङ्घले माग गर्र्दै आएको थियो ।
