उम्मेदवार छनोटको जिम्मा देउवालाई

काठमाडौं । नेपाली कांग्रेसले संसदीय समिति बनाए पनि कार्यसम्पादन समितिको बैठकले महानगरपालिका र उपमहानगरपालिकाको प्रमुख र उपप्रमुखको उम्मेदवार चयन गर्ने अधिकार सभापति देउवालाई नै दिएको छ ।

१३ पदाधिकारी र वरिष्ठ नेता रामचन्द्र पौडेललाई राखेर काँग्रेसले संसदीय समिति बनाएको हो । विधानअनुसार पार्टी सभापति स्वतः संसदीय समितिको सभापति र महामन्त्री संसदीय समितिको महामन्त्री हुनेछन् ।

कार्यसमितिका पदाधिकारीहरु पदेन सदस्य हुनेछन् भने सभापतिको प्रस्तावमा केन्द्रीय कार्यसमितिले सदस्यमध्ये बढीमा ११ जना सदस्य तोक्न सक्नेछन् ।

तर देउवाले आइतबार वरिष्ठ नेता पौडेलको नाम मात्र प्रस्ताव गरेका छन् । डा. शेखर कोइरालालाई राख्न चाहेनन् । आइतबार नै समितिको पहिलो बैठक बसेको छ ।

संसदीय समितिको निर्णयलाई आइतबार नै बसेको कार्यसम्पादन समितिको दोस्रो बैठकले अनुमोदन गरेको जीवन परियारले बताए ।