एनटिभी रोडमा ब्राउनसुगर सहित एक जना प्रहरीको नियन्त्रणमा

बाँके । ब्राउनसुगर सहित एक जनालाई प्रहरीले पक्राउ गरेको छ । जिल्ला प्रहरी कार्यालय बाँके र लागू औषध नियन्त्रण ब्यूरो कार्यालय नेपालगन्ज शाखाको संयुक्त प्रहरी टोलीले ४४ ग्राम ५ सय २० मिलिग्राम ब्राउन सुगर सहित इन्द्रमणी गौतमलाई पक्राउ गरेको हो ।

कोहलपुर नगरपालिका वडा नं.११ एनटिभी रोड स्थित लागु औषध ब्राउनसुगरको कारोबार भईरहेको सूचनाको आधारमा प्रहरीले गौतमलाई पक्राउ गरेको हो । कोहलपुर वडा नं.१२ वस्ने वर्ष ४५ को गौतमलाई तलासी लिने क्रममा उनले लगाएको पाईन्टको खल्तीमा रहेको सेतो प्लाष्टिकको पुडिया बनाई राखेको ब्राउनसुगर ४४ ग्राम ५२० मिलिग्राम रहेको जिल्ला प्रहरी कार्यालय बाँकेले जनाएको छ ।

पक्राउ परेका गौतमको खान तलासी गर्दा तौल गर्ने डिजिटल मेसिन थान १ समेत फेला परेको प्रहरी निरिक्षक इश्वर देव गिरीले बताए । गौतम यसभन्दा पहिला जाजरकोट जिल्लामा लागू औषध चरेस मुद्दामा समेत पक्राउ परी १८ महिना कैद भुक्तान गरी छुटेको बाँके प्रहरीले जनाएको छ ।