खानेपानी आयोजना निर्माणका लागि अर्थ मन्त्रालयको सहमति

काठमाण्डौ । जुम्लामा धौलीगाड खानेपानी आयोजना निर्माण गर्न अर्थ मन्त्रालयले सहमति दिएको छ । आयोजना निर्माण लागत एक अर्ब २६ करोड आठ लाख चार सय ९० रुपैयाँ रहेको छ । धौलीगाड बृहत् खानेपानी आयोजनाको बहुवर्षीय ठेक्कासम्बन्धी मापदण्ड, २०७७ बमोजिम सहमतिका लागि लेखिएको विषय पेस हुँदा राष्ट्रिय योजना आयोगको निर्णयअनुसार प्रक्रिया पूरा गरी खरिद प्रक्रिया अघि बढाउने गरी मन्त्रिस्तरीय निर्णय भएको अर्थ मन्त्रालयको पत्रमा उल्लेख छ ।

कर्णाली प्रदेशको हिमाली जिल्ला जुम्लामा आयोजना बनेपछि जुम्ला सदरमुकाममा खानेपानी अभाव हट्नेछ । चन्दननाथ, गुठीचौर र तातोपानी गाउँपालिका गरी नौ हजार एक सय ८ घरधुरीका ४४ हजार १६३ जनसङ्ख्या लाभान्वित हुनेछन् । तीन वटै पालिकाबाट एक करोड ४६ लाख रुपैयाँ बैंकमा अग्रिम जम्मा गरेपछि आयोजना सफल भएको छ । चन्दननाथ नगरपालिकाले ५० लाख, तातोपानी गाउँपालिकाले ५० लाख र गुठीचौर गाउँपालिकाले ४६ लाख रुपैयाँ बजेट बैंक धरौटी राखेका छन् ।