गोरुपाल्ने किसानलाई भत्ता दिने

पाल्पा । रिब्दिकोट गाउँपालिका–१ को कार्यालयले गोरुपालन गर्ने किसानलाई प्रोत्साहन भत्ता दिने भएको छ । आगामी आर्थिक वर्षदेखि लागू हुने गरी गाउँमा बसेर गोरुपालन गर्ने किसानलाई प्रोत्साहन भत्ता दिने भएको हो ।

गाउँका खेतबारी हराभरा बनोस् भन्दै नयाँ हलगोरु किनेर पाल्ने किसानलाई एक हल गोरु बराबर रु पाँच हजार भक्ता दिने कार्यक्रम ल्याएको वडाध्यक्ष चिरञ्जीवी पोखरेलले बताए ।

नयाँ किन्नेलाई रु पाँच हजार, घरमा नियमित पालिरहने किसानलाई वार्षिक दुई हजार पाँच सय भत्ता दिइने जनाएको छ । अहिले गाउँघरमा गोरुपालन हराउँदै गएको अवस्थामा गोरुको संरक्षण र खेतबारी बाँझिन नदिनका लागि गोरुपालनमा भक्ताको कार्यक्रम ल्याइएको हो । कृषिलाई बढवा दिन यो नीति लिएको वडाध्यक्ष पोखरेल बताए ।