ककनीमा तीन घर जलेर खरानी 

काठमाण्डौ । नुवाकोटको ककनीमा आगलागी हुँदा तीन वटा घर जलेका छन् । नुवाकोट जिल्लाको ककनी गाँउपालिका–३ अचराङमा तीन दाजुभाइको घर जलेर नष्ट भएको हो । स्थानीय बासिन्दा र ककनीबाट खटिएको प्रहरी टोलीले आगो निभाएका जनाइएको छ । आगलागीबाट तीन दाजुभाइ मैते तामाङ, बुद्धिमान तामाङ र सागर तामाङको घर जलेर नष्ट भएको नुवाकोट प्रहरीले जनाएको छ ।

पीडित परिवारलाई जिल्ला प्रशासन कार्यालय नुवाकोटले टेन्टलगायत राहत सामग्री उपलब्ध गराउने जनाएको छ । घरमा भएका सर–सामान सबै जलेर नष्ट भएको छ । तीन दाजुभाइको गरी ५० लाख रुपैयाँभन्दा धेरैको क्षति भएको प्रारम्भिक अनुमान छ ।