- २८ श्रावण २०८३, बिहीबार / Aug 13, 2026
काठमाडौं । नेपाली कांग्रेस १४औं महाधिवेशन नजिकिएसंगै आजदेखि प्रदेशसभा निर्वाचन क्षेत्रको अधिवेशनमा होमिएको छ । अधिवेशन आज शुक्रबारबाट सुरुहुदै छ । देशैभरिका तीन सय ३० प्रदेशमा अधिवेशन हुन लागेको कांग्रेस प्रवक्ता विश्वप्रकाश शर्माले बताए ।
कांग्रेस केन्द्रीय महाधिवेशन यहि २४–२६ मंसिरमा काठमाडौँमा हुदैछ । सर्लाही, सिन्धुपाल्चोक र रसुवाका वडा र गाउँपालिका तहमा बाहेक अन्य ठाउँमा शुक्रबार नै अधिवेशन हुने कांग्रेस निर्वाचन समितिका सचिव केशव रिजालले बताए ।
प्रदेश सभा क्षेत्रीय अधिवेशनले कम्तीमा तीन महिलासहित १० जना प्रत्यक्ष र महिला, दलित, आदिवासी जनजाति, खसआर्य, मधेसी, थारु, मुस्लिम, पिछडिएको क्षेत्रबाट ६ जना प्रदेश सभा क्षेत्रको जनसंख्याको बनोटअनुसार, तोकिएबमोजिम समानुपातिक आधारमा गरी जम्मा १६ जना प्रतिनिधि निर्वाचित गर्नेछ ।
प्रदेश अधिवेशनको प्रतिनिधि हुन क्रियाशील सदस्यता प्राप्त गरेको तीन वर्ष पुगेको हुनुपर्नेछ । प्रदेश सभा कार्यसमितिमा एक सभापति, दुई उपसभापति, दुई सचिव र दुई सहसचिव निर्वाचनबाट छानिने काँग्रेसले जनाएको छ।कार्यसमितिमा आएका १६ जना प्रतिनिधिमध्येबाट कोषाध्यक्ष मनोनयन गरिनेछ ।
सभापतिले कार्यसमितिको २० प्रतिशत अर्थात् चार जना सदस्य मनोनीत गर्ने छन् भने जनसंख्याका आधारमा प्रदेश सभा निर्वाचन समिति २७ सदस्यीय वा त्यो भन्दा केही तल माथि हुने बताइएको छ ।
