प्रतिनिधिसभाको बैठक सूचना टाँस गरेर स्थगित

काठमाडौँ । प्रतिनिधिसभाको बैठक सूचना गरेर स्थगित गरेको छ । विपक्षी ३ राजनीतिक दलले गरेको अवरुद्धका कारण प्रतिनिधि सभाको बैठक सोमबार ११ बजेसम्मका लागि सूचना टारगरि स्थगित गरेको हो । राष्ट्रपतिबाट प्रमाणीकरण भएको नागरिकता विधेयक रद्द गर्नुपर्ने, संसदमा प्रधानमन्त्री प्रचण्डले जवाफ दिनुपर्ने माग गर्दै संसदमा नाराबाजी गरेपछि सभामुख देवराज घिमिरेले १ घण्टाका लागि बैठक स्थगित गरेका थिए ।

आइतबार ११ बजेपछि बसेको आइतबारको बैठकमा विपक्षी दलहरू एमाले, रास्वपा र राप्रपाका सांसदहरूले निष्क्रिय नागरिकता विधेयक प्रमाणीकरण गरेर असंवैधानिक काम गरेको, प्रधानमन्त्री प्रचण्डको भारत भ्रमण विवादास्पद रहेको र अदालतको फैसलाको पूर्ण पाठ नआउँदै कैदीलाई आममाफी दिएको विषयमा विरोध जनाउँदै बैठक अवरुद्ध गरेका थिए ।

संसदमा कुरा नमिलेपछि आइतबार बैठक बस्न नसक्ने विशेष कारण देखाउँदै भोलि अर्थात जेठ २२ गते सोमबार बिहान ११ बजे बस्नेगरी बैठकको समय निर्धारण गरिएको छ । बैठक स्थगन लगतै अवरुद्ध संसद् खुलाउन सभामुख घिमिरेले सत्तापक्ष र विपक्षी दलका प्रमुख सचेतक र सचेतकसँग अनौपचारिक छलफल गरेको संसद सचिवालयले जनाएको छ ।