मोरङ कांग्रेस सभापतिमा लिम्बू विजयी

मोरङ । नेपाली कांग्रेस मोरङको सभापतिमा डिगबहादुर लिम्बू निर्वाचित भएका छन् । लिम्बू पार्टीको १४औँ महाधिवेशनअन्तर्गत मंगलबार भएको निर्वाचनमा भारी मतान्तरले विजयी भएका हुन् ।

उनले १ हजार ९०६ मत प्राप्त गरेका छन् । मंगलबार राति सार्वजनिक भएको दोस्रो चरणको निर्वाचनको अन्तिम मत परिणाम अनुसार देउवा पक्षीय उम्मेदवार दिलीप गच्छदारलाई लिम्बूले ४८१ मतान्तरले पराजित गरे ।

गच्छदारले १ हजार ४२५ मत ल्याए भने २५ मत बदर भएको जिल्ला निर्वाचन अधिकृत केदार कार्कीले बताए । मंगलबारको निर्वाचनमा ३ हजार ३ सय ५६ मत खसेको थियो ।

मोरङ कांग्रेसको नेतृत्व चयनका लागि आइतबार पहिलो चरणको निर्वाचन हुँदा ३ हजार ४१३ मत खसेको थियो। त्यतिबेला पनि लिम्बूले नै सर्वाधिक मत पाएका थिए।