रुसी समकक्षी सर्गेई लभारोभसँग चिनियाँ विदेशमन्त्री वाङ यीले भेटवार्ता गर्ने

मस्को । रुसी समकक्षी सर्गेई लभारोभसँग चिनियाँ विदेशमन्त्री वाङ यीले भेटवार्ता गर्ने भएका छन् । सोमबार विदेशमन्त्री यी रुसको भ्रमणमा निस्किएका हुन् । उत्तर कोरिया नेता किम जोङ उन र रुसी राष्ट्रपति भ्लादिमिर पुटिनबीचको भेटवार्ता लगत्तै मन्त्री यी रुस जान लागेका हुन् ।

अमेरिकाले मस्को र प्योङयाङबीच हतियार उपलब्ध गराउने विषयमा छलफल भएको आशङ्का व्यक्त गरेको छ । चिनियाँ विदेश मन्त्रालयका अनुसार यी सेप्टेम्बर १८ देखि २१ सम्म रुसको भ्रमणमा रहनेछन् । गत हप्ता रुसको विदेश मन्त्रालयले पनि एक वक्तव्य जारी गर्दै दुई नेताबीच दुई पक्षीय सहकार्यका विभिन्न पक्ष तथा युक्रेनको समस्या समाधानका विषयमा छलफल हुने बताएको थियो ।