- १९ श्रावण २०८३, मंगलवार / Aug 4, 2026
सुर्खेत । असोज ३१ देखि कात्तिक १ गतेसम्मको अविरल वर्षाले धानखेत बगर बनेपछि जुम्लाका किसानहरुको कमाइखाने आधार बन्द भएको छ । मार्सी धानको भण्डारण गर्ने जुम्ला तिला गाउँपालिका–४ का स्थानीय किसानहरुको मुखमा गाँस खोसिँदा बेसाहारा बनेका हुन् ।
यहाँ किसानहरु कात्तिक २ गते धान काटेर भण्डारण गर्ने तयारीमा थिए तर दशैका कारण धानबाली भण्डारण गर्न पाएका थिएनन् । विगतका वर्षमा भन्दा यस वर्ष धान निकै राम्रो फलेको किसानहरुले बताएका थिए तर
एक दिनको ढिलाले उनीहरुको जीउने आधार बगर बन्न पुग्यो । पसिना बगाएर फलाएको अन्नबाली बाढीले बगाउँदा अहिले त्यहाँका किसान भोकमरीको चिन्ताले पिरोलिन थालेको एक किसानले बताए ।
बाढीले अन्न उत्पादन गर्ने धानखेत बगर बनेको छ । सरकारले दुई कट्टा चामल दिनुभन्दा धानखेत बनाउन सहयोग पुर्याए दीर्घकालीन समस्या समाधान हुन्छ । जनताको दुःखको बेला दुःख बुझ्न नआउने जनप्रतिनिधि र सरकार चुनावताका खेत–खेतमा धान रोप्न सहयोग गरेजस्तो गर्दै भोट माग्न आउँने किसानहरुले दुखेसो पोखे ।
सिँचाइ कार्यालय जुम्लाका प्रमुख अनुप श्रेष्ठका अनुसार बाढीले तातोपानी गाउँपालिका(४ गिरीखोला जुम्लाको सिँचाइ क्षेत्रमा मात्र १५ करोड क्षति पुर्याएको छ । विद्युत नहुँदा तिला तथा तातोपानी गाउँपालिका–४ जुम्लाका स्थानीय समुदाय अन्धकारमा रात बिताउँदै आएका छन । कात्तिक २ गते रातिको बाढीले यहाँ चारवटा विद्युतगृह ध्वस्त बनाएको थियो ।
बाढीले यहाँका घर, विद्यालय, विद्युत्, स्याउ बगैँचा, दर्जनौँ काठका पुल, खानेपानी परियोजना, स्थानीय घट्ट र विशेषगरी चार हजार रोपनीभन्दा बढी धान खेतीयोग्य भूमि बगर बनाएको छ । धेरै किसान सुकुम्बासी हुनुपर्ने समस्या आइलागेको छ ।
तिला गाउँपालिकाका अध्यक्ष रतननाथ योगीले घरसहित करेसाबारी क्षति भएकालाई आठ लाख ५० हजार र घर क्षति मात्र भएकालाई पाँच लाख दिने सरकारले निर्णय गरेको बताए ।
धानखेती क्षतिको यकिन विवरणलाई आधार मानी बाढीले ढाकेको र बगर बनाएको अवस्थाअनुसार किसानलाई राहत वितरण तथा क्षतिपूर्ति न्यायायिक ढङ्गले गरिने उनले बताए ।
