सरकारसंग समन्वय नहुँदा सेनालाई समस्या

काठमाडौं । सरकारी संयन्त्रबीच समन्वय हुन नसक्दा नेपाली सेनाले फास्ट ट्रयाक निर्माणको काममा समस्या भएको बताएको छ । काठमाडौं तराई द्रुतमार्ग खोकनामा विवाद सिर्जना भएपछि उसले यस्तो बताएको हो ।

संसदको विकास तथा प्रविधि समितिमा भएको छलफलमा सेनाले बाहिरी चक्रपथ निर्माण, स्मार्ट सिटी निर्माण लगायत आयोजनाका विषयमा सरकारी निकायबीच नै समन्वय हुन नसकेको बताएको जिकिर गरेको छ ।

द्रुतमार्ग निर्माण हुँदा नै स्थानीयले जग्गा नमासिनेगरी काम गर्न आग्रह गरेपछि बागमतीमा दुईवटा पुल थप्नेगरी काम सुरु गरिएको भए पनि बाहिरी चक्रपथ र स्मार्ट सिटी परियोजनामा आवश्यक समन्वय हुन नसक्दा समस्या बढेको सेनाका बलाधिकृत रथी प्रभुराम शर्माले बताए ।