- २० श्रावण २०८३, बुधबार / Aug 5, 2026
३० साउन काठमाडौं । सिन्धुपाल्चोक जुगल गाउँपालिका–२ लिदीमा गएको पहिरोमा बेपत्ता भएका ७ जनाको शव भेटिएको छ। जिल्ला प्रहरी कार्यालय सिन्धुपाल्चोकका प्रवक्ता डिएसपी माधवप्रसाद काफ्लेका अनुसार उनीहरुको सनाखत भने हुन सकेको छैन। पहिरोमा परेर गम्भीर घाइते भएका पाँच जनाको हेलिकप्टरबाट उद्धार गरिएको छ ।
चार जनाको सदरमुकाम चौतारामा उपचार भइरहेको छ भने एक जना घाइतेलाई काठमाडौंको सिभिल अस्पताल ल्याइएको छ। नेपाली सेनाको टोलीले गम्भीर घाइते भएका पाँच जनाको हेलिकप्टरबाट उद्धार गरेको हो । गृहमन्त्री रामबहादुर थापा राहत सामाग्री लगेर अहिले सिन्धुपाल्चोक तर्फ लागेका छन् ।
कालिकोट पहिरोमा ६ जनाको मृत्यु
यता कालिकोटको महावै गाउँपालिका र नरहरीनाथ गाउँपालिकामा पहिरो जाँदा ६ जनाको मृत्यु भएको छ । अविरल वर्षाका कारण राज बहादुर विष्टको घरमा पहिरो जाँदा छ जनाको मृत्यु भएको हो ।
कालिकोट नरहरीनाथ गापाको वडा न १ मा दुईजना च्यापिएको अवस्थामा हेलिकप्टरबाट उद्धार गरी नेपालगंज रिफर गरिएको कालिकोटका प्रमुख जिल्ला अधिकारी चन्द्र प्रसाद गैरेले कैलाश खबरलाई बताए । जोखिमपूर्ण वस्ती सार्ने कार्य भैरहेको उनले जानकारी दिए । सुरक्षित ठाउँमा राखेर पानपीनको व्यवस्था मिलाउन स्थानीय तहलाई भनिसकेको उनको भनाई छ ।
