सेना दिवसमा सैनिक मञ्च टुडिखेलमा विशेष समारोह हुने

काठमाडौं । नेपाली सेनाले शिवरात्रीको अवसरमा सेना दिवस मनाउँदै छ । नेपाली सेनाले शिवरात्रीको अवसरमा सेना दिवस देशभर विविध कार्यक्रम गरी मनाउँने भएको हो । काठमाडौंको सैनिक मञ्च टुँडिखेलमा विशेष समारोहमा राष्ट्रपति विद्यादेवी भण्डारी सहभागी हुने कार्यक्रम रहेको नेपाली सेनाले जनाएको छ । देशभरका सेनाका कार्यालय, विभाग, फर्मेशन, पृतना, बाहिनी, युनिट तथा सव–युनिटले पनि आ–आफ्नो क्षेत्रमा विभिन्न कार्यक्रम गरी सेना दिवस भव्यताका साथ मनाउँने जनाइएको छ ।

समारोहमा राइफल तथा तोपबाट बढाइँ कवाज, त्रिभुवन आर्मी क्लबका खेलाडी र राष्ट्रिय सेवा दलका क्याडेटलगायत विभिन्न युनिटबाट मार्चपाष्ट, बख्तरबन्द गाडी, हतियार र इक्युप्मेन्ट प्रदर्शन, ब्याण्ड डिस्प्ले, हेलिकप्टरबाट नेपालको राष्ट्रिय झण्डा र सेना दिवस लेखिएको ब्यानर प्रदर्शनी तथा पुष्पवृष्टि गरिने छ । सैनिक मञ्चमा परेड तथा तोप बढाइँ, कवाजलगायत विविध सांस्कृतिक कार्यक्रम समेत सञ्चालन हुनेछन् ।