१० लाख रोहिंग्या शरणार्थीहरुको ज्यान जोखिममा

एजेन्सी । बंगलादेशका ठूला शरणार्थी शिबिरहरु उच्च जोखिममा रहको विज्ञहरुले चेतावनी दिएका छन् । जलवायु बिज्ञहरुले दक्षिणपुर्वी बंगलादेशको तटीय क्षेत्र कक्स बजार चक्रवात, डढेलो र पहिरोको उच्च जोखिममा रहेको चेतावनी दिएका हुन । हालै आएको मोचा आँधीले कक्स बजार पुर्ण रुपमा ध्वस्त हुँदा त्यहाँका शरणार्थीहरुको अवस्था दयनीय भएको विज्ञहरुले बताएका छन् ।

यही समयमा फेरी आँधी आएको खण्डमा स्थिती झन भयावय हुने भन्दै शरणार्थीहरुको जीवन रक्षाका लागि तत्काल ठोस कदम चाल्नुपर्ने विज्ञहरुले बताएका छन् ।
छिमेकी मुलुक म्यानमारको रखाइन क्षेत्रमा बढी प्रभाव पारेको आँधी बंगलादेश प्रवेश गर्दा कक्स बजारमा मात्रै २१ हजार शरणार्थीहरु प्रभावित भएका थिए । म्यानमारमा सेनाको ज्यादतीका कारण लाखौं रोहिंग्याहरु बंगलादेशमा शरण लिन पुगेका छन् ।

जलवायु न्युनिकरणमा ध्यान नदिए त्यहाँका १० लाख रोहिंग्या शरणार्थीहरुको ज्यान जोखिममा रहेको विज्ञहरुको दाबी छ । जलवायु परिवर्तन र बिकासका लागि अन्तराष्ट्रिय केन्द्रले रोहिंग्या शिविरहरुमा पहिरोको उच्च जोखिम कायम रहेको र चक्रवातको कल्पना दर्दनाक भएको जनाएको छ ।