- २१ असार २०८३, आईतवार / Jul 5, 2026
सोलुखुम्बु । सोमवारदेखि सोलु कोरिडोर १३२ केभी प्रसारण लाइन सञ्चालनमा आउने भएको छ । फागुन २ गतेबाट सञ्चालन गर्ने तयारी भइरहेको आयोजनाले जानकारी दिएको हो । परीक्षण प्रसारणको क्रममा कुनै अवरोध नभएकाले आयोजनाको काम करिब १ महिना अगाडि नै सम्पन्न भए पनि रुट क्षेत्रमा रुख बिरुवाको सङ्ख्या बढेपछि पुनः कटानको स्वीकृति लिने प्रक्रिया अघि बढाउँदा समय लागेको आयोजनाले जनाएको छ ।
प्रसारण लाइन सञ्चालनमा आउनासाथ २३ दशमलव ५ मेगावाटको सोलु खोला आयोजनाको विद्युत् प्रवाह हुनेछ । २०७६ सालको चैतदेखि सञ्चालनमा आएको आयोजना प्रसारण लाइनको समस्याकै कारण पूर्ण क्षमतामा सञ्चालनमा आउन सकेको छैन । प्राधिकरणले वन क्षेत्रको रुटमा हुर्किएका र थपिएका रुख कटानका लागि गरेको प्रस्ताव मन्त्रालयमा पुगिसकेको छ । वन क्षेत्रमा हुर्किएका र बढेका ३ सय ६४ रुख बिरुवा कटानका लागि प्रस्ताव पेस गरिएको छ । सन् २०१६ को सेप्टेम्बर २५ देखि यो प्रसारण लाइनको निर्माण सुरु भएको थियो ।
