- २९ श्रावण २०८३, शुक्रबार / Aug 14, 2026
पाल्पा, १ भदौ । पूर्वी पाल्पाको रामपुर नगरपालिकाका १० वर्षीय बालक पवन कुमाल उपचारको अभावका कारण दिनभर फलामे खोरमा थुनिन बाध्य भएका छन् । जन्मेदेखि मानसिक र शारीरिक रूपमा अशक्त पवन एक वर्षबाट बिहानदेखि साँझसम्म खोरमै राखिँदै आएका हुन् ।
उनका बुवा कृष्णबहादुर अहिले खाडीमा वैदेशिक रोजगारीमा छन् भने आमा पूर्णमाया कुमाल घरमै छिन् । पवन एक वर्षको हुँदा खुट्टाको उपचारका लागि काभ्रेपलाञ्चोकको बनेपा अस्पताल लगिएको थियो । त्यसपछि मुटुमा समस्या देखिएपछि शल्यक्रिया गरियो । चिकित्सकले मस्तिष्कको शल्यक्रिया पनि आवश्यक भएको बताएका थिए ।
तर, मस्तिष्क शल्यक्रियाका लागि करिब सात लाख रुपैयाँ खर्च लाग्ने भएकाले परिवारले आर्थिक अभावका कारण उनकाे उपचार गराउन सकिरहेको छैन । आमा पूर्णमायाले कान्छो छोरा विद्यालय पठाउँदा पवनलाई खोरमा राख्न बाध्य भएको बताएकी छन् । पवन जुम्ल्याहा छोरामध्ये पवन जेठो छोरा हुन् ।
