- १२ जेष्ठ २०८३, मंगलवार / May 26, 2026
काठमाडौं, १ भदौ । पाकिस्तानमा लगातारको भारी वर्षापछि आएको बाढी र पहिरोका कारण पछिल्लो ४८ घण्टामा कम्तिमा ३ सय ४० जनाको मृत्यु भएको छ । सबैभन्दा बढी क्षति खैबर पख्तुनख्वा प्रान्तमा भएको छ, जहाँ ३ सय २८ जनाको मृत्यु र दर्जनौं घाइते भएका छन् । त्यसबाहेक पाकिस्तान अधिनस्थ जम्मु-कश्मीरमा ११ र गिलगित-बलिस्तान क्षेत्रमा १२ जनाको ज्यान गएको छ ।
मृत्यु हुनेमा अधिकांश महिला र बालबालिका छन् । उद्धार कार्यमा २ हजारभन्दा बढी व्यक्ति खटिएका छन् र उद्दार जारी रहेकाले मृतकको संख्या अझ बढ्न सक्ने अधिकारीहरूले जनाएका छन् । पाकिस्तानी सेनाले प्रभावित क्षेत्रमा ६ सय टन खाद्यान्न पठाएको छ । सरकारले बुनर, बजौर, मानसेरा र बट्टाग्राम जिल्लालाई ‘विपद् प्रभावित क्षेत्र’ घोषणा गरेको छ । स्थानीय बासिन्दाले यस घटना ‘प्रलयको दिन’ सरह भयावह भएको बताएका छन् ।
यसैबीच उद्धारमा प्रयोग भइरहेको प्रान्तीय सरकारको हेलिकोप्टर मौसम खराबीका कारण दुर्घटना हुँदा दुई पाइलटसहित पाँच जनाले ज्यान गुमाएका छन् । पाकिस्तानको मौसम विभागले आगामी दिनमा झनै भारी वर्षाको चेतावनी दिएको छ र जोखिमयुक्त स्थानबाट टाढा रहन आग्रह गरेको छ । सरकारले शनिबार देशव्यापी शोकको घोषणा गरेको थियाे भने राष्ट्रिय झण्डा आधा झुकाइएको छ । मृतकलाई राजकीय सम्मानसहित अन्त्येष्टि गरिने पाकिस्तान सरकारले जनाएको छ ।
जलवायु परिवर्तनका कारण पाकिस्तानमा यस्ता घटनाहरू बढ्दो क्रममा छन् । यस वर्षको असामान्य मनसुनले अहिलेसम्म ५ सयभन्दा बढीको ज्यान लिएको छ ।
