१३ वर्षीय किशोरको न्युयोर्कमा गोली हानी हत्या

एजेन्सी । एक किशोरलाई न्युयोर्कका एक प्रहरी अधिकारीले गोली हानी हत्या गरेका छन्। प्रहरीकाअनुसार ती किशोरले हतियार देखाएपछि एक अधिकारीले उनलाई गोली हानेका हुन्। उनको स्थानीय अस्पतालमा लगिएपछि मृत्यु भएको प्रहरीले जनाएको छ।

प्रहरीले १३ वर्षीय एसियाली पुरुषको रूपमा पहिचान गरेको किशोरलाई शुक्रबार रोकेपछि उनी भागेका थिए। प्रहरीले पिछा गरेपछि ती किशोरले पेलेट गन देखाएको प्रहरीको दाबी रहेको छ। युटिकाका मेयर माइकल पी ग्यालिमेले पुलिस ब्रिफिङपछि दोभाषेको सहयोगमा परिवारका सदस्यहरूसँग कुरा गर्ने प्रयास गर्दा किशोरकी आमा विचलित देखिइएको जनाएको छ ।

अमेरिकी मिडियाले उक्त किशोरको परिवार म्यानमारबाट आएका शरणार्थी भएको बताएको छ। प्रहरी अधिकारीले १३ वर्षीय किशोरलाई किन रोके भन्ने कुनै कारण खुलाइएको छैन। प्रहरीले आयोजना गरेको पत्रकार सम्मेलनमा समेत संलग्न अधिकारी र किशोरको नाम खुलाइएको छैन।