नक्कली नोटसहित दाङमा ४ जना पक्राउ

दाङ । नक्कली नोटसहित दाङमा ४ जना पक्राउ परेका छन् । उनीहरूलाई एक हजारका १२ वटा नक्कली नोटसहित प्रहरीले पक्राउ गरेको हो ।

पक्राउ पर्नेमा तुलसीपुर उपमहानगरपालिका १० राइखल्यान बस्ने ३० वर्षीय राममणि चौधरी, तुलसीपुर ८ बस्ने १७ वर्षीय सुमन बिक, तुलसीपुर ९ दोघरे बस्ने १९ वर्षीय धन बहादुर खत्री र शान्तिनगर गाउँपालिका ४ घरभइ हाल तुलसीपुर ९ बेलुवा बस्ने १७ वर्षीय शिसिर बिक रहेको इलाका प्रहरी कार्यालय तुलसीपुरले जनाएको छ।

उनीहरूलाई नियन्त्रणमा लिइ चेकचाँज गर्दा एक हजारका १२ वटा नोट फेला पारेको प्रहरीले जनाएको छ। उनीहरूलाई इप्रका तुलसीपुरमा ल्याई थप अनुसन्धान भइरहेको प्रहरीले जनाएको छ।

प्रहरीका अनुसार तुलसीपुर ९ बेलुवा र तुलसीपुर ५ बसपार्क पीपलबोट स्थित अवैध रुपमा नक्कली नोटको कारोबार भइरहेको भन्ने गोप्य सूचनाको आधारमा इप्रका तुलसीपुरबाट गएको प्रहरी टोलीले पक्राउ गरेको हो।