मुसा मार्ने विष खाँदा ४ वर्षीय बालिकाको मृत्यु

काठमाडौं । गुल्मीमा मुसा मार्ने विष खाँदा ४ वर्षीय बालिकाको मृत्यु भएको छ भने अर्की बालिका बिरामी परेकी छन् । इस्मा गाउँपालिका वडा नम्बर १ ठाँटीकाचौर निवासी सपना सुनारकी ४ वर्षकी छोरी प्रिन्साको ज्यान गएको जिल्ला प्रहरी कार्यालय गुल्मीले जनाएको छ ।सँगै विष खाएकी बसुन्धरा सुनारकी ५ वर्षकी छोरी दिब्सीका गम्भीर बिरामी परेकी छन् ।

आमाहरू सपना र बसुन्धराले कोदो रोप्न जाँदा बारीमा बालिकाहरूलाई पनि लगेका र उनीहरूले खेल्ने क्रममा फोहोरसँगै बारीमा फालिएको मुसा मार्ने औषधि भेटेर खाएको पाइएको प्रहरीले जनाएको छ ।

विष खाएको पाइएपछि उनीहरूलाई उपचारका लागि जिल्ला अस्पताल तम्घास पुर्‍याएकोमा प्रिन्साको उपचारकै क्रममा ज्यान गएको हो ।