बाँदरको गोठालो सरकारी कर्मचारी

पर्वत । जिल्लामा बाँदर आतङ्क बढेपछि दक्षिण पर्वतको पैंयुँ गाउँपालिकाले बाँदर धपाउन कर्मचारी नै खटाएको छ । गाउँपालिकाका सातवटै वडामा बाँदरको आतङ्क बढेपछि कर्मचारी नै नियुक्त गरेर बाली जोगाउन थालिएको हो ।

गाउँपालिकाको १३औँ गाउँसभाले सातवटै वडामा बाँदर हेरालु कर्मचारी नियुक्त गरेको प्रमुख प्रशासकीय अधिकृत राजीव रिमालले बताए । न्यूनतम पाँच–पाँच जनाका दरले कर्मचारी राख्ने तयारी भएको उनको भनाइ छ। हरेक वडामा पाँच जनाका दरले ३५ कर्मचारी नियुक्त गर्ने, उनीहरूको सेवासुविधाका बारेमा अहिले छलफल भइरहेको रिमालको भनाइ छ ।

नियन्त्रण हुन नसकेपछि कर्मचारी नै नियुक्त गरेर बाँदर धपाइने गाउँपालिकाका अध्यक्ष तोरण मल्ल ठकुरीले बताए। बाँदर नियन्त्रण योजना कार्यान्वयन गर्न चालु आर्थिक वर्षमा पालिकाले सात लाख रकम विनियोजन गरेको छ ।