- २२ श्रावण २०८३, शुक्रबार / Aug 7, 2026
बैतडी, १० फागुन । आसन्न प्रतिनिधिसभा सदस्य निर्वाचनलाई मध्यनजर गर्दै बैतडीमा मदिराजन्य पदार्थ बिक्री वितरण तथा ओसारपसारमा कडाइ गरिएको छ । निर्वाचनलाई स्वच्छ , निष्पक्ष र भयरहित वातावरणमा सम्पन्न गर्न यस्तो निर्णय गरिएको हो ।
जिल्ला प्रशासन कार्यालयका प्रशासकीय अधिकृत भोजलाल थारूका अनुसार फागुन ९ गतेदेखि निर्वाचन सम्पन्न नभएसम्म साँझ ७ः०० बजेपछि मदिरा बिक्री वितरणमा रोक लगाइएको छ ।
मदिराजन्य पदार्थको बिक्री वितरण तथा उपभोगलाई व्यवस्थित गर्न व्यवसायीहरूसँग छलफल गरी कडाइ गर्ने निर्णय गरिएको जनाइएको छ ।
मौन अवधिमा मदिराजन्य वस्तुको बिक्री वितरण पूर्ण रूपमा निषेध गरिनेछ । साथै फागुन ११ गतेदेखि २४ गतेसम्म मदिरा दुवानी तथा ओसारपसार नगर्ने निर्णय गरिएको छ ।
निर्णय उल्लङ्घन गरेको पाइएमा प्रचलित कानुनबमोजिम कारबाही गरिने प्रशासनले जनाएको छ । प्रतिनिधिसभा निर्वाचनका लागि बैतडीमा ११ जना उम्मेदवार चुनावी मैदानमा रहेका छन् ।
