- २६ असार २०८३, शुक्रबार / Jul 10, 2026
रौतहट, १६ पुष । भारतीय सीमा जोडिएको बाराको सिम्रौनगढ नगरपालिका क्षेत्रबाट प्रहरीले १० किलो लागुऔषध गाँजासहित दुई जना युवकलाई पक्राउ गरेको छ।
गएराति गाँजासहित पक्राउ पर्नेमा बारा पचरौता नगरपालिका–३ रामनगर टोलका ३३ वर्षीय राजकुमार कुशवाहा र २८ वर्षीय पुनदेव पटेल रहेको इलाका प्रहरी कार्यालय सिम्रौनगढका प्रमुख इन्स्पेक्टर कृष्णदेव साहले जानकारी दिए।
मंगलबार राति सवा ८ बजे मोटरसाइकलमार्फत गाँजा ओसारपसार भइरहेको सूचना प्राप्त भएपछि इलाका प्रहरी कार्यालय सिम्रौनगढबाट सई बालाराज गिरी र प्रहरीचौकी अमृतगन्जबाट असई विश्वराज कुशवाहाको कमान्डमा संयुक्त प्रहरी टोली परिचालन गरिएको थियो।
टोलीले सिम्रौनगढ नगरपालिका–३ ब्रह्मस्थान रामनगरबाट डाट गाउँतर्फ जाँदै गरेको ना ५४ प ६१८६ नम्बरको मोटरसाइकल रोकेर चेकजाँच गर्दा झोलाभित्र लुकाइछिपाई राखिएको दुई पोका गरी १० किलो गाँजा बरामद गरिएको इन्स्पेक्टर साहले बताए। पक्राउ परेका दुवै जनामाथि थप अनुसन्धान भइरहेको प्रहरीले जनाएको छ।
