- २१ श्रावण २०८३, बिहीबार / Aug 6, 2026
भक्तपुर, ५ माघ २०८२ । भक्तपुर निर्वाचन क्षेत्र नम्बर २ मा नेकपा एमालेका प्रभावशाली नेता महेश बस्नेतविरुद्ध राष्ट्रिय स्वतन्त्र पार्टी (रास्वपा) ले राजीव खत्रीलाई उम्मेदवार बनाउने निर्णय गरेको छ । खत्रीले सुरुमा काठमाडौं निर्वाचन क्षेत्र नम्बर १० बाट उम्मेदवारी दिने तयारी गरेका थिए । तर पार्टीभित्रको छलफलपछि अन्ततः भक्तपुर–२ बाट उम्मेदवारी दिने टुंगो लागेको हो ।
जेन–जी आन्दोलनपछि महेश बस्नेतले काठमाडौं महानगरपालिकाका मेयर बालेन्द्र शाह (बालेन) विरुद्ध निरन्तर आलोचना गर्दै आएका छन् । यसै कारण बालेनले ‘जसरी पनि बस्नेतलाई पराजित गर्ने’ रणनीतिअन्तर्गत खत्रीलाई अघि सारेको बुझिएको छ । खत्री पेशाले पूर्वसञ्चारकर्मी हुन् ।
सामाजिक सञ्जालमा महेश बस्नेत र राजीव खत्रीबीच लामो समयदेखि वाकयुद्ध चल्दै आएको छ । खत्रीले बस्नेतविरुद्ध तीखा टिप्पणी गर्दै आएका छन् भने बस्नेतले पनि खत्रीको नामै लिएर जवाफ दिने गरेका छन् । यस आपसी कटुताका कारण भक्तपुर–२ को चुनावी भिडन्त रोचक हुने अनुमान गरिएको छ ।
भक्तपुर–२ महेश बस्नेतको परम्परागत निर्वाचन क्षेत्र हो । राजीव खत्री भने काठमाडौं–१० का बासिन्दा हुन् । गत आम निर्वाचनमा बस्नेत पराजित भएका थिए भने खत्री यो निर्वाचनमार्फत पहिलोपटक सक्रिय राजनीतिमा चुनावी मैदानमा उत्रँदै छन् ।
खत्रीले काठमाडौं–१० बाट उम्मेदवारी दिन पार्टीमा इच्छा व्यक्त गरे पनि पार्टी सभापति रवि लामिछाने र बालेन्द्र शाहसँगको सल्लाहपछि उनलाई भक्तपुर–२ बाट उठाउने निर्णय गरिएको स्रोतले जनाएको छ ।
