- ११ भाद्र २०८३, बिहीबार / Aug 27, 2026
काठमाण्डौ, १८ चैत्र । भक्तपुरको मध्यपुरथिमि नगरपालिका–५ राधेराधेमा रहेको यातायात व्यवस्था कार्यालयमा सेवाग्राहीलाई सास्ती दिने दुई जना विचौलियालाई प्रहरीले पक्राउ गरेको छ।
प्रहरी वृत्त थिमिबाट खटिएको टोलीले लिखित तथा प्रयोगात्मक परीक्षा पास गराइदिन्छु भन्दै सेवाग्राहीसँग रकम असुल्दै हिँड्ने उनीहरूलाई पक्राउ गरेको जिल्ला प्रहरी परिसर भक्तपुरका प्रहरी नायब उपरीक्षक प्रकाश जवेगुले जानकारी दिनुभयो।
पक्राउ पर्नेमा सिन्धुपाल्चोक जुगल गाउँपालिका–६ घर भई हाल राधेराधे बस्ने २९ वर्षीया यमकुमारी श्रेष्ठ र चितवन कालिका नगरपालिका–६ घर भई हाल राधेराधे बस्ने ३० वर्षीय सुनील थापा रहेका छन्।
उनीहरूले सेवाग्राहीलाई अनावश्यक दुःख, हैरानी तथा सार्वजनिक सेवा प्रवाहमा अवरोध सिर्जना गरेको आरोप छ । यसअघि काठमाण्डौको सानो भर्याङस्थित यातायात व्यवस्था कार्यालयबाट ७ जना विचौलिया पक्राउ परेका थिए।
त्यस्तै ललितपुरको एकान्तकुना यातायात कार्यालयबाट १५ जनालाई पनि विचौलियाको आरोपमा नियन्त्रणमा लिइएको थियो। प्रहरीले सार्वजनिक सेवा क्षेत्रमा हुने यस्ता अवैध गतिविधिविरुद्ध कारबाहीलाई निरन्तरता दिने जनाएको छ।
