- ५ कार्तिक २०८३, बिहीबार / Oct 22, 2026
पाल्पा, १ बैशाख । पाल्पाको पूर्वखोला गाउँपालिकामा आर्टिफिसियल इन्टेलिजेन्स (एआई) प्रविधिमार्फत क्षयरोगी पहिचान गर्ने अभियान सञ्चालन गरिएको छ।
जिल्ला स्वास्थ्य कार्यालयको समन्वयमा सञ्चालन भइरहेको यस अभियानअन्तर्गत वीरकोट र सिलुवा स्वास्थ्य चौकीमा विशेष स्वास्थ्य शिविर राखिएको छ। अभियानका क्रममा वीरकोट स्वास्थ्य चौकीमा १८७ जना र सिलुवा स्वास्थ्य चौकीमा २८० जनाको स्वास्थ्य परीक्षण गरिएको छ।
परीक्षणका क्रममा वीरकोटमा ३४ जना र सिलुवामा ४५ जना शङ्कास्पद बिरामी भेटिएका छन्। तीमध्ये चार जनामा क्षयरोग पुष्टि भई तत्काल उपचार सुरु गरिएको स्वास्थ्य शाखाले जनाएको छ।
गाउँपालिकाका स्वास्थ्य शाखा प्रमुख मोहन ढकाल का अनुसार एआई प्रविधिले फोक्सोको एक्सरे तस्बिरलाई विशेष सफ्टवेयरमार्फत विश्लेषण गरी सामान्य एक्सरेमा देखिन नसक्ने सूक्ष्म समस्यासमेत पहिचान गर्न सक्षम हुन्छ। यस प्रविधिले खकार परीक्षणअघि नै जोखिमयुक्त बिरामी पहिचान गर्न सहयोग पुग्ने उनले बताए।
अभियानका क्रममा भेटिएका शङ्कास्पद बिरामीहरूलाई थप परीक्षणका लागि तानसेनस्थित युनाइटेड मिसन अस्पताल मा रिफर गरिएको छ।
