- ३१ असार २०८३, बुधबार / Jul 15, 2026
काठमाण्डौ । २०३१ सालमा प्रदर्शनीमार्गमा रहेको रत्नराज्यलक्ष्मी क्याम्पसमा पत्रकारिताको अध्ययनअध्यापन शुरु भएको धेरैपछि त्रिभुवन विश्वविद्यालयको पत्रकारिता तथा आमसञ्चार केन्द्रीय विभाग बल्खुमा आफ्नै नवनिर्मित भवनमा औपचारिक रुपमा सरेको छ । विभाग परिसरमा बुधबार नयाँ भवनको उद्घाटन त्रिविका कार्यवाहक उपकुलपति प्रा.डा. शिवलाल भुसालले गरेसंगै आफ्नै भवनमा सरको हो ।
नयाँ भवनमा सुविधासम्पन्न कक्षाकोठा, प्राध्यापक कक्ष, रेडियो स्टुडियो, फिल्म अध्ययनस्थल, मल्टिमिडिया कक्ष, पुस्तकालय, अन्तर्राष्ट्रियस्तरको सभाहल, अतिथि प्राध्यापक आवासलगायत रहेका छन् । विसं २०७३ मा रत्नराज्य लक्ष्मी क्याम्पसमा छुट्टै प्रशासनिक संरचनाअन्तर्गत सञ्चालित केन्द्रीय विभाग अबदेखि बल्खुमा रहेको सुविधासम्पन्न भवनमा सञ्चालन हुन थालेको छ ।
लामो समय प्रमाणपत्र तह र स्नातक तहको अध्यापन हुँदै आएकामा त्रिविले २०५८ सालदेखि पत्रकारिता तथा आमसञ्चार विषयमा स्नातकोत्तर, २०६७ देखि विद्यावारिधि (पीएचडी) र विसं २०७४ देखि दर्शनाचार्य तथा विद्यावारिधि (एमफिल पीएचडी) तहको अध्यापन शुरु गरेको थियो ।
पत्रकारिताको प्राज्ञिक अध्ययन अनुसन्धानका लागि आवश्यक सबै सुविधा रहेको केन्द्रीय विभाग भवन चार वर्षमा निर्माण सम्पन्न भएको हो ।
