- २६ असार २०८३, शुक्रबार / Jul 10, 2026
ब्रसेल्स । युरोपेली संघ (ईयू) को खाद्य सुरक्षा निकाय युरोपियन फुड सेफ्टी अथोरिटी (ईएफएसए) ले विभिन्न देशमा उत्पादन हुने पाउडर दूधमा पाइने विषाक्त तत्व नियन्त्रणका लागि नयाँ सीमा प्रस्ताव गरेको छ ।
ईएफएसएले शिशुका लागि प्रयोग हुने फर्मुला दूधमा प्रतिलिटर ०.०५४ माइक्रोग्राम सेरुलाइड तथा ६ महिनाभन्दा माथिका शिशुका लागि तयार गरिने दूधमा प्रतिलिटर ०.१ माइक्रोग्रामसम्मको सेरुलाइड मात्रा सुरक्षित स्तरभित्र रहने प्रस्ताव गरेको हो ।
यो नयाँ प्रस्तावपछि पाउडर दूधमा विषाक्तताको मापदण्ड एकरूप हुने वा त्यसलाई लिएर विवाद उत्पन्न हुने भन्ने विषयमा तत्काल स्पष्ट हुन नसकिने एएफपीले जनाएको छ । सेरुलाइडको जोखिमबारे आवाज उठेपछि नेस्ले, डानोन र ल्याक्टालिसजस्ता ठूला दुग्ध उत्पादक कम्पनीहरूले गएको डिसेम्बरदेखि फ्रान्ससहित ६० भन्दा बढी देशमा पहिलो ६ महिनाका शिशुका लागि तयार पारिएका र बजारमा पठाइएका केही उत्पादन फिर्ता बोलाएका थिए ।
युरोपेली आयोगले शिशुका लागि बनाइने खाद्य उत्पादनमा सेरुलाइडको सुरक्षित मात्रा निर्धारण गर्ने जिम्मेवारी ईएफएसएलाई दिएको थियो । सोही जिम्मेवारीअनुसार नयाँ वैज्ञानिक मूल्याङ्कनका आधारमा यो प्रस्ताव सार्वजनिक गरिएको ईएफएसएले जनाएको छ । विशेषज्ञहरूका अनुसार सेरुलाइड उच्च मात्रामा सेवन हुँदा शिशुहरूको स्वास्थ्यमा गम्भीर असर पर्न सक्ने भएकाले स्पष्ट र कडा मापदण्ड आवश्यक रहेको बताइँदै आएको छ ।
