- २६ असार २०८३, शुक्रबार / Jul 10, 2026
काठमाण्डौ, १४ बैशाख । आजदेखि देशभर कक्षा १२ को वार्षिक परीक्षा सुरु भएको छ । बिहान ८ बजेदेखि परीक्षा सञ्चालन भएको राष्ट्रिय परीक्षा बोर्ड ले जनाएको छ ।
बोर्डका अनुसार यस वर्षको परीक्षामा कुल ४ लाख १८ हजार ८ जना परीक्षार्थी सहभागी भएका छन् । तीमध्ये नियमिततर्फ ३ लाख ३२ हजार १ सय ७८ जना र आंशिकतर्फ ८५ हजार ८ सय ३० जना विद्यार्थी सहभागी रहेका छन् ।
२०७९ साल यताका विद्यार्थीहरू आंशिक परीक्षामा समेटिएका छन् भने एभरेस्ट स्कुल जापान बाट समेत ३६ जना विद्यार्थी परीक्षामा सहभागी भएका छन् । यस वर्ष परीक्षार्थी संख्या घटेसँगै परीक्षा केन्द्रको संख्या पनि घटाइएको छ । देशभर १ हजार ४ सय २१ वटा परीक्षा केन्द्र निर्धारण गरिएको बोर्डले जनाएको छ । गएको वर्ष ५ लाख ११ हजारभन्दा बढी परीक्षार्थी सहभागी भएका थिए ।
परीक्षा बिहान ८ बजेदेखि ११ बजेसम्म सञ्चालन हुनेछ । परीक्षा केन्द्रभित्र मोबाइल फोन, स्मार्ट घडी लगायतका विद्युतीय उपकरण लैजान निषेध गरिएको छ । यो परीक्षा आउँदो २७ गतेसम्म सञ्चालन हुनेछ । परीक्षा सम्पन्न भएको डेढ महिनाभित्रै नतिजा सार्वजनिक गर्ने तयारी गरिएको बोर्डले जनाएको छ ।
