ब्राजिलको कोप–३० सम्मेलन स्थलमा आगलागी: १३ घाइते, हजारौं सहभागी सुरक्षित स्थानमा सारिए

एजेन्सी । ब्राजिलको बेलेमस्थित संयुक्त राष्ट्रसंघको कोप–३० जलवायु शिखर सम्मेलनको मुख्य स्थलमा भएको आगलागीमा १३ जना घाइते भएका छन् । स्थानीय समय अनुसार दिउँसो २ बजे मण्डपभित्र आगो लागेपछि सम्मेलनस्थलमा व्यापक हताशा र त्रास फैलिएको थियो ।

घटना हुँदा करिब १९० देशका ५० हजारभन्दा बढी कूटनीतिज्ञ, पत्रकार तथा जलवायु कार्यकर्ताहरू उपस्थित थिए । आगलागीपछिकाे बाक्लो धुवाँ धेरै किलोमिटर टाढासम्म देखिएको थियो, जसका कारण सहभागीहरू दौडधुप गर्दै बाहिर निस्किन बाध्य भएका थिए । दर्जनौं दमकल र एम्बुलेन्स घटनास्थलमा तत्काल परिचालन गरिएको थियो । संयुक्त राष्ट्रसंघ कोप–३० प्रेसिडेन्सीका अनुसार आगो करिब छ मिनेटमै नियन्त्रणमा ल्याइएको थियाे । आगलागीपछि सुरु भएको भारी वर्षाले छिटो खाली गर्न सहयोग पुगेको बताइएको छ ।

वार्षिक जलवायु परिवर्तन सम्मेलन कोप–३० नोभेम्बर १० देखि सञ्चालनमा रहेको छ र सम्मेलन आज अन्तिम दिनमा पुगेको छ । कार्यक्रममा सहभागी १९० भन्दा बढी देशका प्रतिनिधि हाल ब्राजिलमै छन् ।