- ३० श्रावण २०८३, शनिबार / Aug 15, 2026
दाङ, २९ चैत्र । तुलसीपुर उपमहानगरपालिका–१६ अन्तर्गत जहदागाउँस्थित एक इँट्टाभट्टामा आइतबार भएको दुर्घटनामा एक मजदुरको ज्यान गएको छ भने अर्का एक जना गम्भीर घाइते भएका छन् ।
जिल्ला प्रहरी कार्यालय दाङका अनुसार स्थानीय सेवा इँट्टाभट्टाको पर्खाल अचानक भत्किँदा काम गरिरहेका मजदुरहरू च्यापिएका थिए । उक्त घटनामा तीर्थराम पासवान (३०) को घटनास्थलमै मृत्यु भएको प्रहरीले जनाएको छ । उनी भारतको बहराइच जिल्लाका बासिन्दा थिए ।
त्यसैगरी सोही दुर्घटनामा देशराज पासवान (३६) गम्भीर घाइते भएका छन् । प्रारम्भिक उपचार दाङमै गरिएपछि थप उपचारका लागि उनलाई कोहलपुर शिक्षण अस्पताल पठाइएको छ । प्रहरीका अनुसार घटनाको थप अनुसन्धान भइरहेको छ ।
पर्खाल भत्किनुको कारण खुल्न बाँकी रहेको र इँट्टाभट्टामा सुरक्षा मापदण्ड पालना भए/नभएको विषयमा पनि छानबिन गरिने बताइएको छ ।
