- २३ बैशाख २०८३, बुधबार / May 6, 2026
काठमाडौं । भूकम्पका कारण जाजरकोट र रुकुममा करिब एक करोड ९० लाखका पशुपन्छीको क्षति भएको छ । भूकम्पमा परी मरेका गाई, गोरु, राँगा, भैँसी, भेडा, बाख्रा तथा पन्छीको मूल्यलाई औसतमा मूल्याङ्कन गरी कृषि तथा पशुपन्छी विकास मन्त्रालयले क्षतिको विवरण निकालेको हो ।
जाजरकोटमा सबैभन्दा धेरै पशुपन्छीको क्षति भएको मन्त्रालयका सहसचिव एवं प्रवक्ता शवनम सिवाकोटीले बताए । उक्त क्षेत्रमा रु एक करोड सात लाख बराबरको क्षति भएको मूल्याङ्कन गरिएको छ ।
दुवै जिल्लामा छ सय छ घाइते पशुको उपचार गरिएको छ भने जाजरकोटमा मात्रै पाँच सय ९२ पशुको उपचार गरिएको छ । भण्डारण गरिएका धान, गहुँ, मकै, कोदोलगायतको क्षति विवरण सुरु गरिएको छ ।
कृषि बाली तथा पशुपन्छी बीमा भएका कृषकको क्षतिपूर्ति दाबी बीमा कम्पनीबाट हुनेछ । विवरणका आधारमा क्षतिपूर्ति उपलब्ध गराउन आवश्यक मापदण्ड बनाइने छ । प्रदेश तथा स्थानीय तहले पनि क्षतिपूर्ति उपलब्ध गराउने मापदण्ड बनाएको भन्दै प्रभावितलाई एकद्वार प्रणालीमार्फत सो प्रदान गरिने उनले जानकारी दिए ।
