- २९ श्रावण २०८३, शुक्रबार / Aug 14, 2026
काठमाडौं । संघीय लोकतान्त्रिक गणतन्त्रमाथि प्रहार हुँदा हेरेर नबस्ने नेकपा (एमाले) का पोलिटब्यूरो सदस्य महेश बस्नेतले बताएका छन् । नेकपा एमाले जिल्ला कमिटी भक्तपुरले आईतबार आयोजना गरेको जिल्ला स्तरीय विस्तारित भेलालाई सम्बोधन गर्दै बस्नेतले राष्ट्र र राष्ट्रिय गानमाथिको प्रहारलाई सहेर नबस्ने बताएका हुन ।
उनले आगमी मंसिर ७ गते माईतीघर मण्डलामा राष्ट्रिय युवा संघ नेपालले आयोजना गरेको कार्यक्रममा भक्तपुरबाट हजारौं नेता, कार्यकर्ता तथा शुभचिन्तक सडकमा उतार्ने बताउदै मंसिर ७ को कार्यक्रम एमालेले कसैसँग जुधाउने उद्देश्यले आयोजना नगरेको जानकारी दिए । ‘संघीय लोकतान्त्रिक गणतन्त्रको असंख्य रिभ्यू गर्न पर्ने कुराहरु होलान् ।‘तर, संघीय लोकतान्त्रिक गणतन्त्रको विकल्प खोज्ने पक्षमा एमाले छैन । हाम्रो लामो बलिदानीबाट प्राप्त, ७० वर्षसम्म हाम्रा अघिल्ला पुस्ताको बलिदानीबाट प्राप्त यो व्यवस्था हो । गणतन्त्रलाई संस्थागत गर्नका लागि ७ गतेको हाम्रो कार्यक्रम हो,’– उनले भने ।
भिडियो हेर्नुहाेस् …
संघीय लोकतान्त्रिक गणतन्त्र कांग्रेस र माओवादीको नक्कली आमाबाबु भएको बताउँदै बस्नेतले गणतन्त्र एमालेको सक्कली आमाबाबु भएको तर्क गरे । कार्यक्रममा बागमती प्रदेशका अध्यक्ष कैलास ढुंगेल, केन्द्रीय सदस्यहरु निर्मल भट्टराई, देवी दुलाल लगायतको उपस्थिति थियो ।
त्यसैगरी कार्यक्रममा मध्यपुरथिमी नगरपालिकाका अध्यक्ष सूर्यलाल श्रेष्ठ, सूर्यविनायक नगरपालिकाका अध्यक्ष रविन्द्र सापकाेटा, चाँगुनारायण नगरपालिकाका अध्यक्ष रामप्रसाद तिम्सिना लगायतले सम्बोधन गरेका थिए ।
मंसिर ७ गते सल्लाघारी चोकमा विहान १० बजे भेला भएर काठमाडौं तर्फ जाने तयारी भएको जिल्ला अध्यक्ष बचन देउजाको भनाई छ ।
