- ३१ भाद्र २०८३, बुधबार / Sep 16, 2026
एजेन्सी, २६ चैत । गधाको दूधबाट बनाइने दुर्लभ प्यूल चीजको मूल्य प्रतिकिलो १२ सय यूरो (१ लाख ८० हजार नेपाली रुपैयाँभन्दा बढी) पर्छ। यो चीज सर्बियाको जासाभिचा प्रकृति आरक्षमा मात्र पाइन्छ, जो राजधानी बेल्ग्रेडबाट करिब ८० किलोमिटर पश्चिममा अवस्थित छ।
आरक्षका प्रबन्धक भुक सिमिचका अनुसार एक किलो प्यूल चीज बनाउन २५ लिटर गधाको दूध चाहिन्छ। “एउटा गधाले यति दूध उत्पादन गर्न डेढ वर्ष लाग्छ,” उनले बीबीसी सर्बियनलाई बताए।
यद्यपि, प्यूल चीज विश्वकै सबैभन्दा महँगो चीज भने होइन। स्पेनको काब्रालेस ब्लू चीजले यो सूचीमा अग्रता लिएको छ। गिनिज बुक अफ वर्ल्ड रेकर्ड्सका अनुसार सन् २०२४ मा २.५ किलो काब्रालेस चीज ३६ हजार यूरोमा बिक्री भएको थियो। यस हिसाबले एक किलोको मूल्य १,४४० यूरो (२ लाख १६ हजार नेपाली रुपैयाँभन्दा बढी) पर्छ।
विश्वप्रसिद्ध टेनिस स्टार नोभाक जोकोभिच पनि प्यूल चीजका प्रशंसक हुन्। उनले आफ्ना रेस्टुराँहरूका लागि एक वर्षको सम्पूर्ण उत्पादन किनेका थिए।
जासाभिचा प्रकृति आरक्ष ३६ वर्ग किलोमिटरमा फैलिएको छ। यो क्षेत्र दुर्लभ वनस्पति, जंगली घोडा, सयौं प्रजातिका चरा र जीवजन्तुले भरिपूर्ण छ। यहाँको गधा फार्म दक्षिणपूर्वी यूरोपकै सबैभन्दा ठूलो मानिन्छ। ३०० गधामध्ये १२ वटा मात्र भाले छन्, जसले यो चीजको उत्पादनलाई थप विशेष बनाउँछ।
