- २६ असार २०८३, शुक्रबार / Jul 10, 2026
रौतहट, ११ फागुन । गौरमा लगाइएको अनिश्चितकालीन कर्फ्यू आदेश हटाइएको छ । दुई समुदायबीच सबगढा क्षेत्रमा देखिएको विवाद साम्य बन्दै गएपछि जिल्ला सुरक्षा समितिको सोमबार बिहान बसेको बैठकले बिहान १० बजेदेखि कर्फ्यू हटाउने निर्णय गरेको हो ।
जिल्ला प्रशासन कार्यालय रौतहटले गत शनिबार दिउँसो १ बजेदेखि अर्को आदेश नभएसम्म लागू हुने गरी कर्फ्यू जारी गरेको थियो । उक्त कर्फ्यू स्थानीय प्रशासन ऐन, २०२८ को दफा ६(९)(क) बमोजिम लागू गरिएको थियो, जसअन्तर्गत आवत–जावत, भेला, सभा, जुलुस तथा प्रदर्शन पूर्ण रूपमा निषेध गरिएको थियो । कर्फ्यूको क्षेत्र पूर्वमा मुडवलवा गेट, पश्चिममा ललवैया बाँध, उत्तरमा बम नहर र दक्षिणमा गौर भन्सार कार्यालय गेटसम्म तोकिएको थियो । साम्प्रदायिक तनाव र सम्भावित झडपलाई मध्यनजर गर्दै प्रशासनले कर्फ्यू लगाएको जनाएको थियो ।
स्थिति नियन्त्रणमा आएपछि दुवै पक्षबीच संवाद र सहमतिमार्फत अवस्था सामान्य बन्दै गएको निष्कर्षसहित कर्फ्यू हटाइएको हो । प्रमुख जिल्ला अधिकारी दिनेश सागर भुसालले बिहान १० बजेदेखि कर्फ्यू पूर्ण रूपमा हटाइएको जानकारी दिँदै हाल जिल्लाको शान्ति सुरक्षा अवस्था सामान्य रहेको बताएका छन् ।
