- ४ जेष्ठ २०८३, सोमबार / May 18, 2026
दोलखा, ११ फागुन । नेपाल कम्युनिष्ट पार्टी (एमाले) दोलखाका संस्थापक नेता शिवप्रसाद भण्डारी पुनः एमालेमै फर्किएका छन् । नेतृ कल्पना भण्डारी, भीमेश्वर नगरपालिकाकी पूर्वउपमेयर शान्त बस्नेतसहित जिल्लाका प्रभावशाली नेता तथा कार्यकर्ताहरू पनि एमालेमा समाहित भएका छन् ।
भण्डारी एमाले दोलखाको दुई कार्यकाल पार्टी प्रमुख, पार्टी केन्द्रीय अनुशासन आयोग सदस्य तथा पूर्व जिविस उपसभापति भइसकेका नेता हुन् । सोमबार बिहान चरिकोटमा आयोजित पुनर्मिलन कार्यक्रममार्फत संस्थापक नेता भण्डारीसहितलाई एमाले दोलखाका उम्मेदवार एवं पूर्वसञ्चार तथा सूचना प्रविधि मन्त्री पार्वत गुरुङ ले औपचारिक रूपमा पार्टीमा स्वागत गरेका थिए ।
कार्यक्रममा एमाले नेता तथा पूर्वमन्त्री आनन्दप्रसाद पोखरेल, संस्थापक नेताद्वय जितवीर लामा र लालकुमार केसी, केन्द्रीय सदस्यहरू रचना खड्का, श्यामकुमार बस्नेतलगायत जिल्लाका अगुवा नेता तथा कार्यकर्ताहरूको उल्लेख्य सहभागिता रहेको थियो । पुनर्मिलन कार्यक्रममा बोल्दै नेता भण्डारीले एमालेको सम्पूर्ण शक्ति एकजुट भएर जनतामाझ जाँदा मात्रै विजय हासिल गर्न सकिने बताए । उनले दोलखामा पार्टीलाई पहिलो शक्ति बनाउन सबै नेता–कार्यकर्तालाई समन्वय र सहकार्यसहित सक्रिय बन्न आह्वान गरे । ‘अब विभाजन र अन्तर्विरोध होइन, एकताको सन्देश लिएर जनताको घरदैलोमा पुग्नुपर्छ,’ उनको भनाइ थियो ।
नेता भण्डारीले आगामी निर्वाचनमा एमाले उम्मेदवार पार्वत गुरुङलाई विजयी गराउन आफू पूर्ण रूपमा प्रतिबद्ध रहेको समेत बताए । ‘दोलखाको विकास र स्थायित्वका लागि एमालेको जित आवश्यक छ,’ उनले भने । चार वर्षअघि एमाले विभाजनपछि भण्डारी नेपाल कम्युनिष्ट पार्टी (एकीकृत समाजवादी) मा पोलिटब्युरो सदस्यको जिम्मेवारीमा थिए । पार्टी महाधिवेशनका क्रममा उनी घनश्याम भुसाल प्यानलबाट उपमहासचिव पदका उम्मेदवार बनेका थिए । अध्यक्ष माधवकुमार नेपाल नेतृत्वको बहुमत निर्णयप्रति असहमति जनाउँदै भण्डारीसहित दोलखाका बहुसङ्ख्यक नेता–कार्यकर्ता पुनः एमाले एकतामा फर्किएका हुन् ।
एमाले नेताहरूले भण्डारीसहित अन्य नेताहरूको पुनरागमनले दोलखामा पार्टीको संगठन थप मजबुत बन्ने विश्वास व्यक्त गरेका छन् । पुराना नेताहरूको अनुभव र कार्यकर्तामाझको प्रभावले आगामी चुनावी अभियानमा सकारात्मक ऊर्जा थप्ने अपेक्षा गरिएको छ ।
