- ४ जेष्ठ २०८३, सोमबार / May 18, 2026
काठमाडौं, ७ फागुन । गाजा मा इजरायली आक्रमणका कारण ज्यान गुमाउने प्यालेस्टिनीको संख्या ७५ हजार नाघेको बताइएको छ ।Al Jazeera का अनुसार हालै सार्वजनिक भएका स्वतन्त्र अध्ययनहरूले गाजाको स्वास्थ्य मन्त्रालयले यसअघि सार्वजनिक गर्दै आएको तथ्यांकभन्दा वास्तविक मृत्युदर उल्लेख्य रूपमा उच्च रहेको देखाएका छन् ।
The Lancet मा प्रकाशित पियर–रिभ्युड अध्ययनले आधिकारिक तथ्यांक अपूर्ण रहेको र हजारौँ मानिसहरूको मृत्यु अभिलेखीकरण हुन बाँकी रहेको औँल्याएको छ । शोधकर्ताहरूका अनुसार भग्नावशेषमुनि पुरिएका, अस्पतालसम्म पुग्न नसकेका तथा भोकमरी वा उपचार अभावका कारण ज्यान गुमाएका व्यक्तिहरूको संख्या आधिकारिक गणनामा नसमेटिएको हुन सक्छ ।
७५ हजार नाघेको आँकडामा ठूलो हिस्सा महिला र बालबालिकाको रहेको उल्लेख गरिएको छ । अक्टोबर २०२५ मा भएको युद्धविराम सम्झौतापछि पनि इजरायली आक्रमण जारी रहेको र त्यसयता ६०० भन्दा बढी प्यालेस्टिनीको मृत्यु भइसकेको जनाइएको छ ।
स्वास्थ्य संरचनाको व्यापक क्षति, अस्पतालहरूको विनाश तथा अत्यावश्यक औषधिको अभावका कारण घाइतेहरूको मृत्युदर बढ्दै गएको बताइएको छ । कूटनीतिज्ञहरूले बढ्दो मानवीय संकटप्रति चिन्ता व्यक्त गर्दै संयुक्त राष्ट्रसंघको सुरक्षा परिषद्मा इजरायलले युद्धविराम उल्लंघन गरेको भन्दै आलोचना गरेका छन् ।
