सुनचाँदीको भाउ घट्यो, आज सुन प्रतितोला ३ लाख १७ हजारमा झर्‍यो

काठमाडौं, २८ फागनु । नेपाली बजारमा बिहीबार सुन र चाँदी दुवैको मूल्य घटेको छ । नेपाल सुनचाँदी व्यवसायी महासंघले आजका लागि सुनको भाउ प्रतितोला ३ लाख १७ हजार रुपैयाँ तोकेको जनाएको छ ।

अघिल्लो दिन सुन प्रतितोला ३ लाख १९ हजार रुपैयाँमा कारोबार भएको थियो । त्यसको तुलनामा आज सुनको मूल्य तोलामा २ हजार रुपैयाँले घटेको हो ।

महासंघका अनुसार नेपाली बजारमा सुनको मूल्य केही समयअघि उच्च विन्दुमा पुगेको थियो । गत माघ १५ गते सुनको भाउ प्रतितोला ३ लाख ३९ हजार रुपैयाँ पुग्दै हालसम्मकै उच्च रेकर्ड कायम भएको थियो ।

यसैबीच चाँदीको भाउ पनि घटेको छ । अघिल्लो दिन प्रतितोला ५ हजार ७२० रुपैयाँमा कारोबार भएको चाँदी आज तोलामा २०५ रुपैयाँ घटेर ५ हजार ५१५ रुपैयाँ कायम भएको महासंघले जनाएको छ ।

अन्तर्राष्ट्रिय बजारको प्रभाव र माग–आपूर्तिको अवस्थाका कारण नेपाली बजारमा पनि सुनचाँदीको मूल्यमा उतारचढाव देखिने गरेको व्यवसायीहरू बताउँछन् ।